é ! Bone annèye !

é ! Bone annèye ! (So l’air di Prindez vosse baston, Simon !)

1. C’èst’ a Bolland è l’èglise Saint-Apollinaire (bis)

Qui nos tchantrans dès novês p’tits rèspleûs po v’plaire

R./ Bravès djins nos v’nans v’tchanter

Bone annèye ! Djoyeûs Noyé !

2. Di tot nosse coûr, nos v’sohaitans ine bone santé (bis)

Dès pan, dès boûr, èt dèl bone tripe po v’bin pwèrter

3. Qui l’bon Diu v’done ine djåbe di djôye tos lès matins (bis)

Èt qui v’sipågne tos lès målheûrs èt lès mèhins !

4. Pwis, so vosse hôt, vos hosserez vosse pitit cint-mèye (bis)

Èt l’coûr bin tchôd, vos f’rez on bê sorire a l’vèye !

5. Ni roûvis nin dè d’ner li strème å p’tits hêlieus (bis)

Ca mutwèt bin qui çoula vi rindrèt mèyeû

6. Avå lès vôyes apwèrtez ås-ôtes li bonheûr (bis)

Vos troûv’rez l’djôye èt i v’sohaîtront bone aweûr

7. Vos bêurez bin ine pitite gote di timps in timps (bis)

On vèrre di vin avou l’famile èt vos vwèzins

8. Nos sohaitans di v’ritrover divins doze meûs (bis)

Nos v’s-èvôyerans, si Diè l’vout, dès novês rèspleû

JPA le 01/03/24 à 8:17